Síminn — Proxy Solicitation & Information Statement 2021

Feb 18, 2021

Síminn

Aðalfundur Símans hf.

Verður haldinn rafrænt fimmtudaginn 11. mars 2021 kl. 16:00

Dagskrá

1. Skýrsla stjórnar um starfsemi félagsins á liðnu starfsári.
2. Staðfesting ársreiknings samstæðu og móðurfélags og tekin ákvörðun um hvernig fara skuli með hagnað eða tap félagsins á reikningsárinu.
3. Ákvörðun um greiðslu arðs.
4. Tillögur til breytinga á samþykktum félagsins, ef borist hafa.
5. Kosning þriggja einstaklinga í tilnefningarnefnd.
6. Kosning stjórnar félagsins.
7. Kosning löggilts endurskoðanda eða endurskoðunarstofu.
8. Ákvörðun um þóknun til stjórnarmanna félagsins fyrir störf þeirra sem og þóknun nefndarmanna í undirnefndum og í tilnefningarnefnd.
9. Tillaga stjórnar um starfskjarastefnu félagsins.
10. Tillaga um lækkun á hlutafé vegna eigin hluta og breytingu á samþykktum félagsins.
11. Tillaga um lækkun á hlutafé með greiðslu til hluthafa og breytingu á samþykktum félagsins.
12. Tillaga um að heimila félaginu kaup á eigin hlutabréfum skv. 55. gr. hlutafélagalaga.
13. Tillögur frá hluthöfum sem ber að taka á dagskrá.
14. Önnur mál.

Tvær tillögur eru um breytingar á samþykktum félagsins vegna lækkunar hlutafjár sem báðar varða grein 4.1 í samþykktunum. Þá er lögð til breyting á viðauka við samþykktir sem tengjast heimild til kaupa á eigin hlutum félagsins.

Stjórn félagsins hefur ákveðið í samræmi við grein 10.6. í samþykktum félagsins að aðalfundur verði eingöngu haldinn rafrænt. Hluthafar sem ætla að sækja fundinn skulu skrá sig á https://www.smartagm.com eigi síðar en fimm dögum fyrir hluthafafundinn, eða fyrir klukkan 16:00, 6. mars 2021. Fundurinn fer fram í gegnum tæknibúnaðinn Lumiglobal þar sem hluthafar geta fylgst með aðalfundarstörfum og tekið þátt í atkvæðagreiðslum.

---

Aðrar upplýsingar

Réttur hluthafa til að fá mál sett á dagskrá aðalfundar

Hver hluthafi á rétt á því að fá ákveðin mál tekin til meðferðar á aðalfundi ef hann gerir um það skriflega eða rafræna kröfu til félagsstjórnar eigi síðar en 10 dögum fyrir fund, þ.e. fyrir kl. 16.00, þann 1. mars 2021. Hægt er að senda tillögur eða ályktanir fyrir fundinn á netfangið hluthafar@siminn.is.

Aðalfundurinn mun eingöngu fara fram á rafrænan hátt, með Lumi AGM snjallforritinu eða Lumi AGM veflausninni. Hluthafar eru hvattir til að sækja Lumi AGM snjallforritið á snjalltæki sitt, t.d. farsíma eða spjaldtölvu, áður en fundurinn hefst, en slík tæki eru nauðsynleg til þátttöku í fundinum. Hluthöfum mun gefast kostur á því að spyrja spurninga á fundinum, í gegnum Lumi AGM snjallforritið og veflausnina. Hluthöfum er heimilt að láta umboðsmann sækja aðalfundinn rafrænt og fara þar með atkvæðisrétt fyrir sína hönd. Hluthafar einir bera ábyrgð á því hvaða einstaklingum/aðilum þeir afhenda aðgangsupplýsingar sínar.

Nánari upplýsingar um aðgangsupplýsingar, þátttöku, skráningu og atkvæðagreiðslu er að finna á vefsíðu félagsins, https://www.siminn.is/umsimann/fundir

Upplýsingar fyrir hluthafa

Heildarfjöldi hluta í félaginu hinn 18. febrúar 2021 er 8.750.000.000 hlutir og atkvæði jafnmörg. Þar af eru virk atkvæði miðað við 12. febrúar 2021, 8.432.652.851.

Aðrar upplýsingar

Á vef félagsins, https://www.siminn.is/umsimann/fundir, er að finna allar frekari upplýsingar í tengslum við aðalfundinn, þ.m.t. frekari upplýsingar um rétt hluthafa til að fá mál sett á dagskrá hluthafafundar og leggja fram ályktunartillögur fyrir fundinn, drög að dagskrá fundarins, tillögur stjórnar félagsins, ársreikning félagsins fyrir árið 2020, umboðseyðublað, framboðseyðublað auk upplýsinga um skjöl sem lögð verða fyrir fundinn. Endanleg dagskrá fundarins og tillögur verða gerðar aðgengilegar hluthöfum 3 dögum fyrir fundinn á framangreindum vef félagsins og skrifstofu félagsins að Ármúla 25, 108 Reykjavík.

Hluthöfum er bent á að skv. 63. gr. a. hlutafélagalaga skal tilkynna skriflega, minnst fimm dögum fyrir hluthafafund, um framboð til stjórnar, þ.e. fyrir kl. 16:00 þann 6. mars 2021 og skal senda framboð á veffangið stjorn@siminn.is. Framboðseyðublað er að finna á vefsíðu félagsins og tilkynnt verður um framboð til stjórnar á vef félagsins eigi síðar en 2 dögum fyrir aðalfundinn. Hluthafar sem vilja leggja til aðra einstaklinga í tilnefningarnefnd en þá sem stjórn hefur tilnefnt skulu senda slíkar tillögur á veffangið stjorn@siminn.is eigi síðar en 7 dögum fyrir aðalfund, eða 4. mars 2021. Framboðseyðublöð má finna á vefsíðu félagsins og verður tilkynnt um framboð til tilnefningarnefndar eigi síðar en tveimur dögum fyrir aðalfund.

Fundurinn fer fram á íslensku.

Reykjavík, 18. febrúar 2021, Stjórn Símans hf.