Solid Clouds hf.

Earnings Release • Dec 11, 2025

Solid Clouds hf: Rekstraráherslur, ný uppfærsla á Starborne Frontiers og næstu áfangar félagsins

Solid Clouds hf: Rekstraráherslur, ný uppfærsla á Starborne Frontiers og næstu áfangar félagsins

Undanfarnir mánuðir hafa verið viðburðaríkir hjá Solid Clouds og markast af tímamótum í starfsemi félagsins. Áherslur félagsins hafa færst frá þróun yfir í markaðssetningu og skölun á leiknum Starborne Frontiers, samhliða markvissri hagræðingu í rekstri til að styðja við þessi nýju verkefni.

Starborne Frontiers

Starborne Frontiers hefur verið í þróun í rúm fjögur ár og aðgengilegur almenningi í rúm tvö ár. Leikurinn byggir á Free-To-Play Live Service viðskiptalíkaninu. Ólíkt mörgum hefðbundnum tölvuleikjum, þar sem stærstur hluti tekna kemur oft fram við útgáfu, byggir vöxtur í þessu módeli á stöðugum efnisuppfærslum og markvissri stýringu skalanlegra auglýsingaherferða til lengri tíma.

Reynsla stærstu leikjafyrirtækja heims sýnir að vel heppnaðir leikir í þessum flokki geta skilað vaxandi tekjum áratugum saman. Lykiljöfnurnar í rekstrinum snúast um að tryggja að tekjur hvers spilara (Lifetime Value) séu fljótt hærri en kostnaðurinn við að ná honum inn (Customer Acquisition Cost). Þegar því markmiði er náð skapast forsendur fyrir hraðri og arðbærri skölun inn á gríðarstóran heimsmarkað.

Árangur og staðan í dag

Fyrsta árið í loftinu var nýtt í að fínpússa byrjendaupplifun leiksins með lágmarks markaðssetningu til að geta ítrað með marktækum gögnum. Síðastliðið ár hefur hins vegar farið í að auka auglýsingamagnið markvisst til að sannreyna arðbærni og mæla skölunarhæfni leiksins.

Eins og fram kom í hálfsársuppgjöri félagsins ollu tæknilegir örðugleikar og tafir á fjármögnun því að draga þurfti verulega úr markaðssetningu í vor og sumar, sem eðli málsins samkvæmt hægði verulega á tekjuvexti. Félagið hefur síðan unnið markvisst að því að ræsa markaðsstarfið að nýju og undanfarna mánuði höfum við framkvæmt fjölmargar prófanir með góðum árangri.

Til að tryggja forsendur fyrir öflugri skölun miðar félagið við að ná auglýsingakostnaði til baka (payback period) á 9 mánuðum að meðaltali. Niðurstöður úr yfirstandandi prófunum eru breytilegar milli mánaða, eins og við er að búast á þessu stigi. Við sjáum mánuði sem þarfnast frekari fínstillingar, en á móti höfum við náð mörgum mánuðum sem fara vel fram úr þessu markmiði og dæmi er um mánuði þar sem kostnaður skilar sér til baka á 3 til 4 mánuðum. 

Þessi árangur er þó einungis fyrsta skrefið í vegferðinni því þegar auglýsingakostnaði hefur verið náð til baka breytist eðli tekjustraumsins. Hver króna sem spilari skilar eftir þann tímapunkt rennur nánast milliliðalaust til styrkingar á rekstrinum og félagið sér ekki fram á þörf á frekari fjárfestingum í innviðum eða framleiðslugetu til að styðja við skölun leiksins.

Næstu áfangar félagsins

Framundan eru spennandi tímar hjá Solid Clouds. Undanfarna mánuði hefur félagið unnið að stórri uppfærslu (e. expansion) sem er fyrsta skrefið í átt að byggja upp langtímaarðsemi leiksins. Þessi uppfærsla, sem nefnist Voidbreach, er lykilþáttur í að hámarka líftíma spilara og fer hún í loftið á næstu dögum. Með uppfærslunni bætast við tvö lokaleiks kerfi (e. endgame system) og eru þau sérstaklega hönnuð til að veita spilurum ný markmið og áskoranir til margra ára.

Við hlökkum til að kynna betur þessar nýjungar og önnur áform á næstunni. Nú þegar umfangsmikilli vinnu við ofangreinda endurskipulagningu er lokið erum við betur í stakk búin til að sækja fram og munum við leggja áherslu á reglulega upplýsingagjöf um þann árangur sem næst.

Fyrir frekari upplýsingar hafið samband við

---

Fjárfestatengsl:

Egill Örn Sigurjónsson

egillsig@solidclouds.com