Síldarvinnslan

M&A Activity • Mar 29, 2023

Disclosure 430795

Síldarvinnslan hf - Innherjaupplýsingar

Viðræður um kaup á helmingshlut í Ice Fresh Seafood ehf.

Stjórn Síldarvinnslunnar hf. hefur samþykkt að hefja viðræður við Samherja hf. um kaup á helmingshlut í sölufélaginu Ice Fresh Seafood ehf. Telur stjórnin það rökrétt framhald af vexti og auknum umsvifum Síldarvinnslunnar hf. á síðustu árum, m.a. með kaupum á Vísi hf., að kanna frekari möguleika á því að styrkja sölu- og markaðsmál félagsins.

Ice Fresh Seafood ehf. hefur lengi verið leiðandi fyrirtæki í sölu- og markaðssetningu sjávarafurða frá Íslandi og hefur meðal annars séð um sölu á hluta afurða Síldarvinnslunnar og Vísis á undanförnum árum. Sölunet fyrirtækisins nær til yfir 60 landa og á bak við það er áratuga þekking og viðskiptasambönd á helstu mörkuðum fyrir íslenskt sjávarfang.

Ice Fresh Seafood ehf. er að fullu í eigu Samherja hf. sem er eigandi að 30,06 % hlut í Síldarvinnslunni hf. Með vísan til ákvæða laga og starfsreglna stjórnar hefur stjórnarformaður Síldarvinnslunnar hf., Þorsteinn Már Baldvinsson, sem er jafnframt forstjóri Samherja hf., því ekki tekið þátt í meðferð máls þessa og ákvörðun innan stjórnar Síldarvinnslunnar hf.

Gerð verður nánari grein fyrir efni og niðurstöðum fyrirhugaðra viðræðna og viðskipta um leið og slíkar upplýsingar liggja fyrir.

Stjórn Síldarvinnslunnar hf.