Ísfélag hf.

Earnings Release • Nov 29, 2024

Uppgjör Ísfélags á þriðja ársfjórðungi 2024

Uppgjör Ísfélags á þriðja ársfjórðungi 2024

Helsta úr starfseminni. 

• Makrílveiðin var mun lakari en vonir stóðu til og uppsjávarskipið Sigurður VE var meira og minna frá vegna bilana.  

• Makrílvinnslan gekk vel og verð fyrir afurðirnar var hátt. 

• Veiðar og vinnsla á norsk-íslenskri síld gengu vel. 

• Kvótar í makríl og norsk-íslenskri síld hafa farið minnkandi undanfarin ár. 

• Verð hefur almennt hækkað á frosnum afurðum félagsins. 

• Verð á mjöli hefur verið gott en lýsisverð hefur lækkað umtalsvert.  

• Sigurbjörg, nýr ísfisktogari félagsins, hóf veiðar um miðjan ágúst. 

• Fiskvinnslu í Þorlákshöfn var hætt í lok september. 

• Afli skipa félagsins á fyrstu 9 mánuðunum var tæp 49.000 tonn. 

• Framleiddar afurðir voru um 31.700 tonn.  

Helstu niðurstöður úr fjárhagsuppgjöri tímabilsins. 

• Rekstrartekjur á þriðja ársfjórðungi námu 52,3 m.USD og 120,6 m.USD á fyrstu 9 mánuðum ársins. 

• Hagnaður tímabilsins nam 9,4 m.USD á þriðja ársfjórðungi og 9,7 m.USD, fyrstu 9 mánuðina. 

• EBITDA framlegð þriðja ársfjórðungs var 19,7 m.USD eða 37,7%. Á fyrstu 9 mánuðum ársins var EBITDA framlegðin 33 m.USD eða 27,3%. 

• Heildareignir námu 780,2 m.USD í lok þriðja ársfjórðungs og var eiginfjárhlutfall 70,1%. 

• Nettó vaxtaberandi skuldir voru 102,7 m.USD í lok ársfjórðungsins. 

Rekstur. 

Rekstrartekjur á þriðja ársfjórðungi námu 52,3 m.USD og á fyrstu 9 mánuðum ársins 2024 námu þær 120,6 m.USD samanborið við 148,5 m.USD á fyrstu 9 mánuðum ársins 2023. Loðnubrestur á vetrarvertíð 2023/2024 hafði mikil áhrif til tekjulækkunar og einnig léleg veiði á makrílvertíð. 

Hagnaður á þriðja ársfjórðungi nam 9,4 m.USD og var hagnaður á fyrstu 9 mánuðum ársins 2024 því 9,7 m.USD, samanborið við hagnað upp á 37 m.USD á fyrstu 9 mánuðum ársins 2023.  

Sama á við um lægri hagnað og lægri tekjur, þ.e. ástæðan er fyrst og fremst að ekki var veidd loðna á vetrarvertíðinni 2023/2024. 

EBITDA framlegð á þriðja ársfjórðungi var 19,7 m.USD eða 37,7%. Á fyrstu 9 mánuðum ársins 2024 var EBITDA framlegðin 33 m.USD eða 27,3% af rekstrartekjum.  

Efnahagur. 

Heildareignir Ísfélagsins voru 780,2 m.USD í lok september 2024, þar af voru fastafjármunir 688,8 m.USD og veltufjármunir 91,4 m.USD.  

Í árslok 2023 voru heildareignir 804,4 m.USD, þar af voru fastafjármunir 663,4 m.USD og veltufjármunir 141 m.USD. Heildareignir lækkuðu um 24,2 m.USD á fyrstu 9 mánuðum ársins 2024. Rekja má lækkunina að mestu til minnkunar birgða og lækkunar á handbæru fé.  

Eigið fé Ísfélagsins var 546,6 m.USD í lok september, en var 554,2 m.USD í lok árs 2023. Eiginfjárhlutfallið var 70% í lok september, en í lok árs 2023 var eiginfjárhlutfallið 68,9%.  

Langtímaskuldir og skuldbindingar voru 182,8 m.USD í lok september, en voru 201,3 m.USD í lok árs 2023. Skammtímaskuldir voru 50,8 m.USD í lok tímabilsins, en í lok árs 2023 voru þær 48,9 m.USD. Nettó vaxtaberandi skuldir félagsins voru 102,7 m.USD í lok september en voru í árslok 2023, 98,5 m.USD.  

Sjóðstreymi. 

Á fyrstu 9 mánuðum ársins 2024 var handbært fé frá rekstri 45,5 m.USD. Fjárfestingarhreyfingar fyrstu 9 mánuði ársins voru neikvæðar um 34,1 m.USD. Fjármögnunarhreyfingar voru neikvæðar um 34,9 m.USD. Lækkun á handbæru fé, fyrstu 9 mánuði ársins 2024 var 23,5 m.USD og var handbært fé í lok tímabilsins 20,4 m.USD. 

Meginniðurstöður í íslenskum krónum fyrstu 9 mánuði ársins 2024. 

Þegar helstu niðurstöður úr rekstrarreikningi tímabilsins eru færðar yfir í íslenskar krónur á meðalgengi fyrstu 9 mánuði ársins 2024 (138,02) voru rekstrartekjur félagsins 16,6 milljarðar króna, rekstrarhagnaður 3 milljarðar króna, hagnaður eftir skatta 1,3 milljarðar króna og EBITDA 4,6 milljarðar króna.  

Sé staða á efnahag félagsins í lok september 2024, færð í íslenskar krónur á lokagengi tímabilsins (134,6), eru heildareignir 105 milljarðar króna, fastafjármunir 92,7 milljarðar króna og veltufjármunir 12,3 milljarðar króna. Eigið fé í lok september 2024 var 73,6 milljarðar króna og skuldir og skuldbindingar 31,4 milljarðar króna.  

Kynningarfundur 29. nóvember 2024.  

Rafrænn kynningarfundur fyrir markaðsaðila og fjárfesta verður haldinn í vefstreymi föstudaginn 29. nóvember klukkan 16:00. Streymið verður aðgengilegt á vefsíðu Ísfélagsins  https://isfelag.is/streymi. Hægt er að senda spurningar á netfangið fjarfestatengsl@isfelag.is. 

Frá Stefáni Friðrikssyni forstjóra 

Makrílveiðar gengu illa og voru það mikil vonbrigði. Ástæðurnar voru fyrst og fremst þær að minna var af makríl bæði í íslensku lögsögunni og á alþjóðlega veiðisvæðinu milli lögsagna Íslands, Noregs og Færeyja. Auk þess bætti ekki úr skák að Sigurður VE, öflugasta uppsjávarskip félagsins, var meira og minna frá veiðum á makrílvertíðinni vegna bilana.  

Veiðar á norsk-íslensku síldinni hófust í byrjun september og stóðu fram í miðjan október. Veiðar og vinnsla gengu vel. 

Verð á flestöllum frosnum afurðum sem félagið framleiðir hefur hækkað og á það bæði við afurðir í bolfiski og uppsjávarfiski. Mjölverð hefur verið stöðugt en gera má ráð fyrir einhverjum lækkunum á nýju ári. Verð á lýsi hefur hins vegar lækkað umtalsvert í haust.  

Sigurbjörg, nýr togari félagsins, hóf veiðar um miðjan ágúst. Í skipinu er flókinn búnaður sem ennþá er verið að slípa til en veiðigeta skipsins er í samræmi við væntingar. 

Fiskvinnslu félagins í Þorlákshöfn var hætt í lok september. Ástæðurnar eru, eins og áður hefur komið fram, annars vegar að ekki eru nægar aflaheimildir til þess að vera með bolfiskvinnslu á fjórum starfsstöðvum og hins vegar aflabrestur í humarveiðum. 

Afurðabirgðir félagsins minnkuðu á tímabilinu. 

Heildarafli skipa félagsins fyrstu níu mánuði ársins var tæp 49.000 tonn samanborið við rúm 122.000 tonn á sama tímabili í fyrra og framleiddar afurðir voru 31.700 tonn samanborið við 66.000 tonn í fyrra.  

Fjárhagsdagatal: 

Birting ársuppgjörs 2024 – 27. mars 2025. 

Fyrsti árfjórðungur 2025 – 27. maí 2025. 

Nánari upplýsingar veitir Stefán Friðriksson, forstjóri. 

Viðhengi: