Marel — M&A Activity 2024

Jun 19, 2024

Marel: Sameiginleg fjárfestakynning vegna fyrirhugaðs yfirtökutilboðs JBT í Marel

Marel: Sameiginleg fjárfestakynning vegna fyrirhugaðs yfirtökutilboðs JBT í Marel

Marel vekur athygli á tilkynningu frá John Bean Technologies Corporation („JBT“) í tengslum við fyrirhugað yfirtökutilboð í allt útgefið og útistandandi hlutafé í Marel.

JBT tilkynnti í dag að gert sé ráð fyrir að samþykki Fjármálaeftirlits Seðlabanka Íslands („FME“) á tilboðsyfirliti og verðbréfalýsingu í tengslum við valfrjálst yfirtökutilboð JBT í Marel liggi fyrir innan skamms. JBT mun leggja yfirtökutilboðið fram þegar samþykki FME hefur borist.

Símafundur fyrir fjárfesta fimmtudaginn 20. júní

JBT og Marel munu halda sameiginlega kynningu fyrir fjárfesta og markaðsaðila á símafundi sem fram fer fimmtudaginn 20. júní kl. 14:00. Þar munu stjórnendur beggja félaga fjalla um þau stóru tækifæri og samlegðaráhrif sem felast í sameiningu félaganna fyrir hluthafa Marel og aðra hagaðila. Símafundurinn mun fara fram á ensku.

Vinsamlegast athugið að fundinum verður streymt í hljóðútsendingu á eftirfarandi vefsíðu: Skráning á símafund. Upptaka af fundinum verður aðgengileg að fundi loknum. Til þess að leggja fram spurningar á fundinum þarf að skrá sig á eftirfarandi vefsíðu: Skráning vegna spurninga. Kynningarefni fundarins verður aðgengilegt á fjárfestasíðum JBT, Marel og á vef Arion banka.

Fjárfestakynning á Íslandi og beint streymi mánudaginn 24. júní

JBT og Marel munu jafnframt halda opinn fjárfestafund mánudaginn 24. júní 2024 kl. 13:00 á íslenskum tíma í höfuðstöðvum Arion Banka. Fundurinn mun fara fram á ensku og verður jafnframt í beinu streymi sem aðgengilegt verður á fjárfestasíðum JBT, Marel og á vef Arion banka.

Skrá þarf mætingu á fundinn fyrirfram þar sem húsrúm er takmarkað, en skráning fer fram hér: Skráning á fjárfestafund JBT og Marel.

Fréttatilkynningu JBT má finna sem viðhengi.

Fjárfestatengsl

Nánari upplýsingar veita fjárfestatengsl Marel í gegnum netfangið ir@marel.com og í síma 563 8001.

Um Marel

Marel (NASDAQ: MAREL; AEX: MAREL) er í fararbroddi á heimsvísu í þróun og framleiðslu tækja, hugbúnaðar og þjónustu fyrir matvælavinnslu. Marel var stofnað árið 1983 og hjá félaginu starfa um 7.300 starfsmenn í yfir 30 löndum (þar af um 800 starfsmenn á Íslandi) og þjónusta viðskiptavini í yfir 140 löndum. Lykilmarkaðir félagsins eru í vinnslu alifugla, kjöts, fisks, gæludýrafóðurs, plöntupróteina og fóðurs fyrir fiskeldi. Félagið er skráð í Kauphöll Íslands og Euronext Amsterdam og skilaði 1,7 milljarði evra í tekjur árið 2023 (257 milljarðar króna), en 46% af heildartekjum koma frá þjónustu og varahlutum. Árlega fjárfestir Marel 5-6% af tekjum í nýsköpun og vöruþróun, eða um 15 milljörðum króna árið 2023, með áherslu á sjálfvirkni, róbótatækni og stafrænar lausnir sem tryggja örugg matvæli sem unnin eru á hagkvæman og sjálfbæran hátt. Frekari upplýsingar má finna á marel.com/ir.

Viðhengi: