Kvika banki

M&A Activity • Jun 13, 2025

Kvika banki hf.: Stjórn Kviku svarar beiðnum um samrunaviðræður

Kvika banki hf.: Stjórn Kviku svarar beiðnum um samrunaviðræður

Vísað er til tilkynninga Kviku banka hf. („Kvika“ eða „bankinn“) frá 27. og 28. maí sl., þar sem fram kom að Arion banki hf. annars vegar og Íslandsbanki hf. hins vegar hefðu óskað eftir viðræðum um mögulegan samruna við Kviku.

Að vel skoðuðu máli er það mat stjórnar Kviku að hvorki erindi Arion banka hf. né Íslandsbanka hf., sem bárust þann 27. og 28. maí sl., endurspegli virði Kviku. Stjórn Kviku telur því ekki forsendur fyrir því að hefja samrunaviðræður á grundvelli framangreindra erinda.

Er það engu að síður mat stjórnar Kviku að umtalsverð tækifæri og verðmæti geti falist í sameinuðum félögum fyrir bæði hluthafa og viðskiptavini. Séu aðilar tilbúnir að endurskoða þær forsendur um virði Kviku sem fram komu í framangreindum erindum, er stjórn Kviku reiðubúin að endurmeta ákvörðun sína varðandi samrunaviðræður. Hefur erindum Arion banka hf. og Íslandsbanka hf. verið svarað á þann veg sem hér að framan greinir.

Vinsamlegast athugið að tilkynning þessi er tilkynning á innherjaupplýsingum í samræmi við 7. gr. reglugerðar (ESB) nr. 596/2014 um markaðssvik („MAR“), sem var veitt lagagildi hérlendis með lögum um aðgerðir gegn markaðssvikum nr. 60/2021.