Klappir Grænar Lausnir hf.

Remuneration Information • Apr 9, 2025

STE – 002 Starfskjarastefna

JAT

Útgáfa: 2.0 ESG: G, S Samþykkt af: Hluthafafundi 2021 Dags.: Áb:

1. gr. Markmið

Markmið starfskjarastefnu þessarar er að gera störf hjá Klöppum grænum lausnum hf. að eftirsóknarverðum kosti fyrir fyrsta flokks starfsfólk og þar með að tryggja félaginu stöðu í fremstu röð. Til að svo megi verða er nauðsynlegt að stjórn félagsins hafi heimild til að bjóða samkeppnishæf laun og aðrar greiðslur s.s. kaupauka og kauprétti. Tekur starfskjarastefnan til starfskjara stjórnarmanna félagsins, framkvæmdastjóra, lykilstarfsmanna og annarra starfsmanna eftir því sem við á hverju sinni. Starfskjarastefna þessi er sett í samræmi við þau skilyrði sem fram koma í 79. gr. a. laga nr. 2/1995 um hlutafélög og með hliðsjón af leiðbeiningum Viðskiptaráðs Íslands um góða stjórnarhætti fyrirtækja.

2. gr. Starfskjör stjórnarmanna

Stjórnarmönnum skal greidd föst mánaðarleg þóknun í samræmi við ákvörðun aðalfundar ár hvert, svo sem kveðið er á um í 79. gr. laga nr. 2/1995 um hlutafélög. Gerir stjórnin tillögu um þóknunina fyrir komandi starfsár og skal í þeim efnum taka mið þeirri ábyrgð sem á þeim hvílir og afkomu félagsins. Þóknun stjórnarformanns skal vera tvöföld sú þóknun sem aðrir stjórnarmenn þiggja. Stjórnarmenn skulu ekki njóta hlutabréfa, kaup- og söluréttar, forkaupsréttar eða annars konar greiðslna sem tengdar eru hlutabréfum í félaginu eða þróun verðs á hlutabréfum í því.

Óheimilt er að gera starfslokasamninga við stjórnarmenn.

3. gr. Starfskjör forstjóra

Gera skal skriflegan ráðningasamning við forstjóra. Heimilt er að endurnýja ráðningasamning við forstjóra á gildistíma hans. Fjárhæð grunnlauna og annarra greiðslna til forstjóra skal taka mið af menntun, reynslu og fyrri störfum og skulu þau vera samkeppnishæf á þeim markaði sem félagið starfar á. Önnur starfskjör skuli vera svo sem tíðkanleg eru hjá sambærilegum fyrirtækjum, svo sem greiðslur í lífeyrissjóð, orlof, afnot af bifreið og uppsagnarfrestur. Endurskoða skal grunnlaun forstjóra árlega og skal við slíka endurskoðun höfð hliðsjón af mati starfskjaranefndar á frammistöðu forstjóra, þróun launakjara almennt í sambærilegum fyrirtækjum og afkomu félagsins.

Við ákvörðun uppsagnarfrests í ráðningasamningi má hafa sérstök ákvæði um lengd uppsagnarfrests sem tekur mið af starfstíma forstjóra. Starfslokagreiðslur skulu ekki fara fram úr ákveðinni fjárhæð og ekki miðast við meira en tveggja ára laun. Starfslokagreiðslurnar skulu ekki fara fram ef starfslok verða vegna ófullnægjandi árangurs.

Við gerð ráðningasamnings við forstjóra skal haft að leiðarljósi að ekki komi til frekari greiðslna við starfslok en fram koma í ráðningasamningi. Heimilt er þó við sérstök skilyrði að mati starfskjaranefndar að gera sérstakan starfslokasamning við starfslok forstjóra.

4. gr. Starfskjör framkvæmdastjóra

Forstjóri ræður framkvæmdastjóra innan samstæðunnar í samráði við stjórn félagsins. Við ákvörðun starfskjara framkvæmdastjóra gilda sömu sjónarmið og rakin eru í 3. gr.

5. gr. Ábyrgðatryggingar

Félagið skal tryggja að á hverjum tíma sé í gildi ábyrgðartrygging fyrir stjórnarmenn og æðstu stjórnendur, bæði starfandi og fyrrverandi, vegna krafna á hendur þeim fyrir ólögmæta athöfn (e. wrongful act) í starfi í þágu

félagsins. Félagið greiðir tryggingariðgjald ábyrgðartryggingarinnar og samkvæmt skilmálum hennar er greiddur eðlilegur kostnaður af málsvörn gagnvart kröfum eða rannsóknum af ofangreindum toga. Félagið skal tryggja að stjórn og stjórnendum sé haldið skaðlausum af kröfum sem á þau kunna að verða gerðar eða á þau kunna að falla vegna starfa fyrir félagið, að svo miklu leyti sem slík krafa er ekki til komin fyrir háttsemi sem metin er til ásetnings eða stórkostlegs gáleysis.

6. gr. Umbun til stjórnenda og annarra starfsmanna

Auk fastra launa er heimilt að veita stjórnendum og starfsmönnum fríðindi, kaupauka og kauprétti með eftirfarandi hætti.

6. a. Fríðindum

Með afnotum tækja og búnaðar sem tengist starfi, svo sem farsíma, tölvu, nettengingu frá heimili til vinnustaðar og annars áþekks búnaðar sem nýtist starfsmanni í hans störfum. Einnig er heimilt að starfsmenn hafi bifreið til afnota ef þörf krefur.

6.b. Kaupréttum

Stjórn félagsins getur veitt stjórnendum og starfsmönnum kauprétt á hlutabréfum í félaginu á grundvelli gildandi kaupréttaráætlunar sem byggir á 10. gr. laga um tekjuskatt nr. 90/2003, sem samþykkt var þann 23. nóvember 2016 og staðfest af ríkisskattstjóra. Skal gerð grein fyrir kauprétti stjórnenda og starfsmanna í Klöppum í ársreikningi félagsins, reglum samkvæmt. Stjórnin tryggir ekki sölurétt stjórnenda og starfsmanna á hlutabréfum sem þeir eiga í Klöppum.

Félaginu er óheimilt, beint eða óbeint, að veita lán og/eða setja tryggingu í tengslum við kaup æðstu stjórnenda félagsins eða tengdra félaga á hlutum í félaginu, sbr. 2. mgr. 104. gr. laga nr. 2/1995 um hlutafélög.

7. gr. Önnur ákvæði

Við ákvörðun starfskjara annarra starfsmanna skulu framkvæmdastjórar einstakra sviða taka mið af ofangreindum reglum eftir því sem við á.

8. gr. Upplýsingagjöf, birting stefnu

Á aðalfundi skal stjórn gera grein fyrir kjörum forstjóra og stjórnarmanna. Upplýsa skal um heildarfjárhæð greiddra launa á árinu, greiðslur frá öðrum félögum í sömu fyrirtækjasamstæðu, fjárhæð kaupauka og kaupréttar, annars konar greiðslur sem tengjast hlutabréfum í félaginu, starfslokagreiðslur ef einhverjar eru, auk heildarfjárhæðar annarra greiðslna.

Starfskjarastefnu þessa skal birta á heimasíðu félagsins.

9. gr. Samþykkt starfskjarastefnu og fleira

Starfskjarastefna félagsins skal tekin til afgreiðslu á aðalfundi og skal hún tekin til endurskoðunar ár hvert og borin undir aðalfund til samþykktar eða synjunar.

10. gr. Útgáfur

Númer	Dags. útg.	Höfundur	Samþykkt	Lýsing	Undirritun
01	20.09.2019	AFG/HJ	JAT	Frumútgáfa
02	13.04.2021	Stjórn	JAT	Endurskoðað